Сәламәтлеккә файдасы бар

Сары мәтрүшкәнең шифалы көче - чәчәкләрендә һәм яфрак­ларында. Алардан дәвалау үзлегенә ия булган май әзерләгез. 500 грамм сары мәтрүшкәгә 1 литр үсемлек мае салыгыз һәм өстен ябып куегыз. 3 атнага караңгы урынга куегыз, вакыт-вакыт алып болгатып торыгыз. «Эликсир» төнәп җиткәч, сөзегез. Салкынча урында сакларга кирәк. Тырналган, киселгән яки озак ятып торганга бозылган урыннарга көненә 2-3 тапкыр сөртегез. Кызарган яки кубырчыкланган тирегә дә файдасы бар.

Канда гемоглобин аз булганда кеше тиз арый, иртән баш әйләнә. Кан күрсәткечен һәм хәлеңне яхшырту өчен тәмле дару ярдәмгә килә. ¼ чәй кашыгы куркума һәм ½ чәй кашыгы балны кушыгыз да 1 стакан кефир яки йогыртка салып бутагыз. Тәмнүшкәне көненә 1-2 тапкыр ашагыз.

Сагыз чәйнәгәндә теш казналыгы бертигез йөкләнеш, ә камашлар массаж ала. Ә бу - пародонтоздан менә дигән профилактика чарасы. Әлеге авыру вакытында тешне урынында тотып тора торган тукыма бозыла һәм алар селкенә башлый. Ул булмасын өчен, ашаганнан соң 5 минут дәвамында сагыз чәйнәгез. Әгәр дә моны ач карынга яки озаграк эшләсәгез - гастрит барлыкка киләчәк.