Сим-карта егермедән артмаска тиеш: Ноябрьдә Россиядә яңа кануннар үз көченә керә

Фото: ясалма интеллект

Салымнар буенча бурычларны судтан тыш түләтү

1 ноябрьдән мәҗбүри түләүләр буенча бурычларны гражданнардан судка мөрәҗәгать итмичә генә алырга мөмкин булачак. Бу бурыч суммасы бәхәс тудырмый торган очракларга кагылачак. Бу хактагы карарны «Госуслуги» яки заказлы хат аша җибәрәчәкләр. Башта акчаларны банк счетларыннан һәм электрон янчыклардан алачаклар, ә иң соңгы очракта — милеккә салачаклар (беренче кирәк-яраклардан тыш). Сумманы яңадан исәпләтү өчен гариза биреп дәгъваларга мөмкин булачак.

Сим-карталар өчен яңа кагыйдәләр

Сим-карталарны контрольдә тоту катгыйланачак. 1 ноябрьдән элемтә операторлары, хуҗасының мәгълүматлары расланмаса яки бер кешедә 20дән артык сим-карта исәпләнсә, номерларга хезмәт күрсәтә алмаячак. Сезгә ничә номер теркәлгәнлеген «Дәүләт хезмәтләре»ндәге «Сим-карта» сервисында тикшерергә мөмкин. Әгәр таныш булмаган номерларны тапсагыз яки аларның саны 20дән артып китсә, артыкларыннан шул ук бүлектә яки оператор офисында баш тартырга кирәк.

Кире кайтарылмый торган кертемнәр буенча иминиятләштерүне арттыру

Андый кертемнәрне ачучылар өчен иминият капламы ике тапкырга артачак – 2,8 млн сумга кадәр. Әгәр банкның лицензиясен алсалар, дәүләт сезгә нәкъ менә шул сумманы кайтарачак. 2,8 млн сумлык лимит гадәти кертемнәр өчен 1,4 млн сумлык стандарт иминиятләштерүдән аерым гамәлдә. Бер кешегә сакланган акчаның гомуми суммасы 4,2 млн сумга җитәргә мөмкин.

Нотариуслар варисның бурычлары турында кисәтәчәк

24 ноябрьдән нотариуслар үлгән кешенең кредит тарихын сорау хокукы алачак. Бу варисларга түләнмәгән кредитлар турында алдан белергә һәм бурычлар белән бәйле мирасны кабул итәргә кирәкме икәнлеген хәл итәргә булышачак.

Очучыларга һәм шахтерларга пенсияләрне яңадан исәпләү

1 ноябрьдә очу экипажлары әгъзаларына һәм күмер сәнәгате хезмәткәрләренә пенсияләренә айлык өстәмә түләү яңадан исәпләнәчәк. Аның күләме индивидуаль һәм элеккеге хезмәт хакына һәм стажына бәйле. Мондый төзәтмәләрне елына дүрт тапкыр ясыйлар.

Брокерлар өчен яңа бурычлар

5 ноябрьдән брокерлар клиентларга ки­лешүләр алдыннан рисклар турында җентекләбрәк сөйләргә тиеш булачак. Әгәр клиент аларны начар белсә, өстәмә финанс инструментларын көчләп тагуны тыячаклар. Шулай ук клиентлардан шикаятьләрне эшкәртү срокларына һәм сыйфатына таләпләр катгыйланачак.

Яңа товарларны маркировкалау

«Гадел билге» системасы киңәюен дәвам итә. 1 ноябрьдән мәҗбүри маркировкага эләгәләр:

• үсемлек майлары;

• терлек азыгы.

Моннан тыш, сәнәгать җиһазларын (мәсәлән, генераторларны һәм двигательләрне) һәм куллану төргәгендәге ашламаларны маркировкалау буенча эксперимент старт ала. Тагын нәрсә үзгәрәчәк Метанол әйләнешен махсус дәүләт реестрына кертелгән компанияләр һәм шәхси эшмәкәрләр генә гамәлгә ашыра алачак. Бу массакүләм агулануларны булдырмау өчен эшләнгән.