Рөстәм Миңнеханов: 9 Май – батырлык, горурлык һәм мәңгелек дан бәйрәме

Фото: «Татар-информ», Гөлнар Гарифуллина

Тантанада катнашучыларны Татарстан Рәисе Рөстәм Миңнеханов чын күңелдән тәбрикләде.

«Хөрмәтле фронтовиклар, тыл хезмәтчәннәре, Казан гарнизоны хәрбиләре! Бөек Җиңүнең 81 еллыгы белән сезне котлыйм. 9 Май – һәрберебез өчен изге көн. Ул – батырлык, горурлык һәм мәңгелек дан бәйрәме», – дип башлады ул чыгышын.

Рөстәм Миңнеханов сугышның авыр елларында халкыбызның рухи ныклыгын, какшамаслыгын аерым ассызыклады. Җиңү өчен бөтен ил көрәшкән. Һәркем Ватан сагында баскан. Татарстаннан сугышка 700 мең кеше киткән. Шуларның яртысы гаиләләренә әйләнеп кайтмаган. Рәисе әйтүенчә, кырыс бәрелешләрдәге батырлыгы, тылдагы фидакарь хезмәте белән Җиңүче буын мәңге безнең йөрәкләрдә яши.

Аннан соң ул бер минут тынлык игълан итте.

Татарстан Рәисе сугыш чорында республикага эвакуацияләнгән предприятиеләрнең дә өлешен зурлап бәяләде. «Тыл хезмәтчәннәре Армияне дә, халыкны да азык-төлек белән тәэмин итте. Табиблар һәм медицина хезмәткәрләре яралы сугышчыларны дәвалаган, аларны сафларга кире кайтарган», – дип белдерде ул.

Рөстәм Миңнеханов аерым игътибарны сугыш елларында халыкның бердәмлегенә, фронт өчен фидакарь тырышлыгына юнәлтте.