Республиканың иң яхшы почтальоны Яшел Үзән районында яши

Иң яхшы почтальон исе­менә бәйге беренче ел гы­на уздырылмый һәм ул инде республиканың бар­лык поч­макларыннан катна­шучыларны җыйды. Конкурста катнашу өчен шартлар шактый катлаулы булды. Хат ташучылар «ТАТМЕДИА» акционерлык җәмгыяте басмаларының тиражларын, узган ел белән чагыштырганда, арттырырга тиеш иде. Бу вазифаңны ты­рышып башкаруны гына түгел, ә үз үчастогыңда яшәүчеләрнең ихтыяҗларын тирәнтен аңлау­ны да таләп итә торган бурыч.

Быел конкурста 200гә якын хат ташучы катнашты. Җиңүчеләр берничә критерий буенча сайланды:

• нәтиҗәдә язылу тиражының абсолют һәм процентлы күрсәткече,
• һәрбер йортта яшәүчеләрне район газетасына языдыру һәм башкалар.

Бәйге барлык катнашучылар өчен дә, аларның тырыш­лыкларын һәм хезмәт сөючәнлеген билгеләүче, чын бәйрәмгә әверелде.

– Эшемне һәм мин хезмәт күрсәткән барлык кешеләрне ихлас яратам, алар да миңа хөрмәтләре белән җавап бирә. Һәрвакыт елмаеп каршы ала, – дип, хезмәтен бәяләүләре сөенече белән уртаклашты Ризәлә ханым. – Үзебезнең район газетасын бик яратам, шуның кадәр эчтәлекле чыга һәм аны һәрбер теләүчегә рәхәтләнеп яздырам, тәкъдим итәм. «Яшел Үзән»нең тиражы үсеп торсын, шулай мине зурлавыгыз өчен Аллаһның рәхмәтләре булсын!

Почтальоннарны «ТАТМЕДИА» төбәк агентлыгы җитәкчесе Айдар Сәлимгәрәев һәм «Татмедиа» АҖ гене­раль директоры Шамил Садыйков сәламләде. Шамил Мөхәммәтович уртак эшнең мөһимлеген билгеләп үтте һәм нәтиҗәнең кулга кул тотынып эшләү сыйфатына бәйле булуын ассызыклады: «Без сезнең белән бер көймәдә», – диде ул.

«Яшел Үзән» газетасы ре­дак­­циясе хезмәткәрләре исемен­нән һәм шәхсән үземнән Ри­зәлә Габдрахмановага, язылу кампаниясендә бәяләп бетер­гесез ярдәме өчен, ихлас рәх­мә­тебезне белдерәм. Һәм, гомумән, почта хезмәткәрләре хез­мәте, эшкә тугрылыклары һәм бәхетлерәк итү теләгеннән кешеләргә табадан гына төшкән яңалыкларны үз вакытында тапшырулары, чыннан да безне илһамландыра. Ризәләне лаеклы бүләге белән котлыйбыз һәм киләчәктә дә почта хезмәте өлкәсендә уңышлар телибез!

Ризәлә Габдрахманова Күгеш авылында туып үскән. Хәзерге вакытта Әрә авылында иптәше Рамил белән яши. Ике канатлары, балалары – Айзилә һәм Айназны тәрбияләп үстергәннәр. Ризәлә 23 ел почтальон вазифасын башкара.