Норлатта балалар йорты ябылудан курыкмыйлар

Гаилә никадәр нык булса, аннан килгән җылылык та шулкадәр көчле була. Ә инде менә шул учакның җылысын һәркемгә дә тоярга насыйп булмаса, нишләргә?

Авыр сорау... Әмма һәркемгә дә әти-әни кочагында иркәләнеп үсәргә насыйп булмаган шул. Бу - ачы чынбарлык. Әйе, ятим калган сабыйларга Норлат балалар йортында үзләрен кеше итеп хис итү өчен бөтен шартлар да тудырылган. Төпле тәрбия, белем, тәмле ризык, чиста кием... Тик иң кадерлесе, иң тәмлесе - әти-әни назыннан мәхрүм алар. Күңелне бер әйбер шатландыра: соңгы елларда Норлат балалар йортында сабыйлар саны кимегән.