Җәмәгать, кеше булудан кайчан туктадык?..

– Бу хәл төнлә булды. Кычкырып көлә-көлә, сөйләшә-сөйләшә ике ир сезнең койманы сүтеп маташа иде. Мин, нишлисез, хәзер полиция килә, дип кычкырдым. Алар ялт кына күздән юк булды. Тәгаен генә шулар, дип әйтә алмыйм, әмма кыя­фәтләре белән бик тә чегәннәргә охшаганнар иде, – дип сөйли бу кыек эшнең шаһите.
Кара металл ватыкларыннан күпме керем алып була? 70-100 суммы? Алар әле җитмәсә куш эчле, җиңел. Ул коймаларның бәясе безгә 60 мең сумга төште. Ә боларга, күрәсең, «халява» бик тә ошап киткән. Каршыбызда, яшәүчеләре яңа фатирларга күченгән авария хәлендәге йортлар. Курку белмәс чегән егетләренең шуларның калай түбәләрен салдырып бетергәннәренә әле ике-өч кенә көн. Бусы алар ихтыярында, әмма ул гамәлләренең дә законлы башкарылмавына иманым камил. Ә монда бит тирә-ягыбызны  матурлау өчен ясалган койма... Сүз юк...
Күршеләребезгә ихлас рәхмәтләремне җиткерәм, дус яшибез, шөкер. Әлеге вакыйга белән бәйләп, газета укучыларыбызга шуны әйтәсем килә: битараф булмасак иде, мондый башбаштаклыкка күз йоммагыз. Җәзасызлык бик тә аздыра. Икенче юлы алар сезнең бакчаны, сезнең подъездны, сезнең йортны сайларга мөмкин.