Күрәзәче боларны каян белә?

— Сезне нидер борчый, — ди күрәзәче. 
— Әйе. (Әгәр борчымаса, сез аңа килмәс идегез бит.) 
— Эшегезд-ә-ә... 
— Юк-юк, эшем миңа ошый. 
— Әйе, яхшы урында эшлисез. Әмма сезгә нәрсәдер тынгы бирми... 
— Эшем әйбәт, ә менә хатыным белән аралар... 
— Эшегез ике арадагы мөнәсәбәтне боза, — ди ул. 
— Әйе, әйе! Нәкъ шулай! 
Игътибарга алдыгызмы: бу алым бары тик логикага корылган. Моңа охшаш тагын бер алым - “Кармак ташлау” - шулай ук еш кулланыла. 
— Сезне шәхси тормышыгыз борчый, — ди күрәзәче. 
Гадәттә, кешене борчыган берничә зур мәсьәлә бар: эш, яшәү урыны, шәхси тормыш. Шул ук балалар, әти-әни, туганнар һ.б. кешеләр белән булган мөнәсәбәтләрне шәхси тормышка кертеп була. Ешрак шушы сорау белән күрәзәчеләргә мөрәҗәгать итәләр дә инде. 
Арытаба күрәзәче сезгә тагын берничә сорау бирәчәк. Алар бер-берсенә бәйле түгел. Мәсәлән, тормыш юлдашыгыз, балаларыгыз, әти-әниегез турында сораячак. Сезнең йөзегездәге, тавышыгыздагы үзгәрешне тойгач, бу сорауларга тукталачак. Арытаба ул сезгә аерым бер кеше турына берничә сорау бирәчәк. Төп проблемаларны сез аңа үзегез әйтәчәксез. Ә ул бу фикерне дәвам итәчәк. Һәм ахырда мотлак берничә вариантка игътибар итәчәк. “Бу юлны сайласагыз — болай булачак, ә менә болай итсәгез — башка төрле...”. 
Ә хәзер уйлап карагыз, моның шулай икәнен сез үзегез дә белә идегез бит... "Кызыл Таң"газетасыннан.