Коткару жилеты тормышны саклап кала алыр иде...

Шимбәдән якшәмбегә каршы төндә Зеленодольск районының Бритвино авылы янында Зөя елгасында көймәдән егылып ир-ат батып үлгән дигән хәбәр килеп ирешә.
ТР Эзләү-коткару хезмәтенең водолазлар төркеме килгәч, ике ир-атның төнлә ишкәкле көймәдә балык тотарга китүе ачыкланган. Балыкчыларның берсе ишкәкләрдә, икенчесе арткы якта утыра. Төн уртасында арткы якта утыручы көймәдән егылып төшә.

Коткаручылар 15 мең кв. м акваторияне тикшергәннәр. Дүшәмбе иртәсендә эзләүләр дәвам итә. 27 май көнне көндез ТР ПССның 2нче зона эзләү-коткару отряды водолазлары ярдан 50 метр ераклыкта 3 метр тирәнлектән полиция хезмәткәрләренә 1989 елда туган ир-атның гәүдәсен тапшыралар.

Үлгән ир-атның коткару жилеты булмаган.

Россия гадәттән тыш хәлләр министрлыгы тәүлекнең караңгы вакытында һәм күрү мөмкинлеге чикләнгән шартларда көймәдә суга чыгарга киңәш итми.

Коткару жилетларын киегез! Үз тормышыгызга салкын карамагыз!