Казан мәктәпләре микоплазма пневмониясе аркасында дистанцион укуга күчә?

Татарстанлылар еш кына микоплазма аркасында хастаханәдән тыш үпкә ялкынсынуы белән авырый, әмма күп санда авырып киткән балалар аркасында мәктәпләрне дистанцион укытуга җибәрүләре турында мәгълүмат юк. Бу хакта “Татар-информ”га Роспотребнадзорның ТР буенча идарәсе матбугат хезмәтендә сөйләделәр.

Элегрәк телеграм-каналларда Казан мәктәпләрендәге укучылар микоплазма үпкә ялкынсынуы белән авырыйлар дигән мәгълүмат барлыкка килде.

"Уку процессын дистант формага күчерү турындагы карар белем бирү учреждениесе директоры тарафыннан мәктәптә (сыйныфта) 20% һәм аннан да күбрәк булган авырулар аркасында хәл ителә. Мәктәпләрне дистантка күчерү турында мәгълүмат юк ", - дип билгеләп үттеләр ведомствода.