«Кадрлар» илкүләм проекты: Татарстанлыларны мәшгульлеккә ничек җәлеп итәләр?

Татарстан Хезмәт, эш белән тәэмин итү һәм социаль яклау министрлыгы хәбәр итүенчә, «Кадрлар» проекты дүрт федераль программаны берләштерә:

• «Хезмәт базарын идарә итү»
• «Хезмәт базары өчен белем бирү»
• «Мәшгульлекне активлаштыру чаралары»
• «Хезмәт кешесе»

Бу программалар икътисадны тотрыклы үстерү, халык сәламәтлеген саклау, гаиләләргә ярдәм күрсәтү кебек милли максатларга ирешүдә зур роль уйный.

Яңа инструментлар һәм фаразлау системасы

«Кадрлар» проекты бары тик эшсезлекне киметү чаралары белән чикләнми, ә инновацион методларны да үз эченә кертә. Мисал өчен, «Хезмәт базары белән идарә итү» программасы кысаларында һәр ел регионда хезмәт базарын анализлау, тармакка һәм квалификациягә карап фаразлар төзү планлаштырыла.

Татарстан Хезмәт министрлыгы урынбасары Клара Таҗетдинова сүзләренчә, бу фаразлар һөнәри уку йортларына һәм югары уку йортларына студентларны кабул итү квоталарын билгеләүдә нигез булып хезмәт итәчәк. Шулай итеп, эш бирүчеләргә квалификацияле кадрлар җитмәү проблемасы чишеләчәк.

Мәшгульлек үзәкләрен модернизацияләү

2025 елда республикадагы барлык эш белән тәэмин итү үзәкләре бердәм стандартларга китереләчәк. Шулай ук эчке миграцияне көчәйтү программалары аша башка регионнардан белгечләр җәлеп ителәчәк.

Клара Таҗетдинова:

«Эш урынын алмаштырырга яки яңа һөнәр өйрәнергә теләүчеләр өчен махсус программалар эшләнә. Моннан тыш, инвалидларны эшкә урнаштыруга аерым игътибар бирелә – беренче яки икенче төркем инвалидны эшкә алган оешмаларга 200 мең сум субсидия түләнәчәк».

Белем бирү һәм эшкә урнаштыру арасында бәйләнеш

Проект кысаларында мәктәп, колледж һәм югары уку йортлары белән эш бирүчеләр арасында элемтә ныгытыла. Мәктәп тәмамлаучыларның эшкә урнашуы һәм хезмәт хаклары буенча мәгълүматлар нигезендә уку йортлары рейтингы төзеләчәк.

«Һөнәре буенча иң яхшы» – осталыкны популярлаштыру

Татарстан 2025–2027 елларда «Радиоэлектрон аппаратура монтажчысы» номинациясендә номинациясендә конкурсның федераль этабының башкаласы итеп сайланды. Шулай ук биредә «Икенче старт» кебек яңа номинацияләрдә катнашып, «Демография» проекты аша һөнәр өйрәнгән кешеләрнең уңышлары күрсәтеләчәк.

Җитештерүчәнлекне күтәрү – төп максат
Клара Таҗетдинова:

«Россия буенча мәшгульлек 3% артачак, ә Татарстан соңгы 5 елда инде шундый күрсәткечкә иреште. «Кадрлар» проекты эшсезлекне киметүдә ярдәм итәргә тиеш, шуңа күрә без яңа рекордларга ышанабыз».

Проект аша Татарстан икътисады өчен яңа мөмкинлекләр ачылачак, ә халыкка – стабиль эш урыннары тәкъдим ителәчәк.