Яшел Үзәндә «Профессионаллар» һөнәри осталык чемпионатының төбәк этабы башланды

ФОТОРЕПОРТАЖ

Чарада Табигатьтән файдалану өлкәсендә күзәтчелек буенча федераль хезмәтенең Идел-Кама төбәкара идарәсе җитәкчесе урынбасары Айрат Шиһапов катнашты. Ул сәламләү сүзе белән чыгыш ясап, ярышларда уңышлар теләде.

–  Әлеге чараның бүгенге этабында барыгызны да сәламләвемә чиксез шатмын. Катнашучыларга мөрәҗәгать итеп шуны әйтәсем килә, сез барыгыз да җиңүчеләр, чөнки төбәк дәрәҗәсенә чыктыгыз.
«Профессионаллар» чемпио­наты – ул югары дәрәҗәдәге һөнәр осталыгының аралашу мәйданчыгы гына түгел, ә үз һөнәренә беренче адым ясау­чылар өчен дә зур мөмкинлек. Әлеге чемпионат киң колачлы һәм ул күп кенә җитештерү, хезмәт күрсәтү тармаклары өчен кызыклы. Аның кысаларында күргәзмәләр һәм презентацияләр уза, ә  катнашучылар һөнәри эшчәнлекләрендә кулланыла торган яңа технологияләр һәм җайланмалар белән таныша алачак.

– 2020 елдан әйләнә-тирә мохитне саклау юнәлеше буенча чемпионатлар уза, әлбәттә, бу бик мөһим. Мәгариф минист­ры билгеләп үткәнчә, барлык компетенция­ләр Россия чемпионатына керә, бу безнең икътисадны үстерү өчен иң перспективалы юнәлеш, – дип азсызыклады ТР экология һәм табигый байлыклар министры урынбасары Ольга Манидичева.

Чемпионатның төп бурычлары:
– Россия Федерациясе субъектлары үзенчәлекләрен исәпкә алып, яңа һөнәри компетенцияләрне булдыру һәм гамәлдәгеләрен үстерү;
– югары һөнәри осталыкка ия һәм аларны эшкә урнаштыруга ярдәм итүче талантлы, перспективалы яшьләрне һәм яшь белгечләрне ачыклау, үстерү һәм аларга ярдәм итү;
– яшүсмерләр һәм яшьләр арасында иң таләп ителгән эшче һөнәрләрен, компетенцияләрне популярлаштыру;
– урта һөнәри белем бирү сис­темасын үстерү.
Шулай итеп, бәйгедә катнашучылар һәм экспертлар тантаналы рәвештә ант бирде һәм чемпионатының төбәк этабы башланды.

– Хәерле сәгатьтә! Монда сезне кызыклы бәйгеләр белән беррәттән тәҗрибә туплау мөмкинлекләре дә көтә. Һәм әлеге чемпионатның төбәк этабын нәкъ менә безнең гимназиябездә узуына мин чиксез шатмын, – дип ассызыклады 5нче гимназия директоры Гүзәлия Нуриева.

Уңышлар сезгә, бәйгедә катнашучылар.