Хезмәт итәргә яраксыз гражданинның пенсиясе кемгә бирелә?

Монда сүз, суд карары буенча Гражданнар кодексы нигезендә хезмәткә яраксыз дип табылган балигъ яшьтәге кеше турында барадыр. Бу - гражданның психикасы какшау нәтиҗәсендә үз гамәлләренең мәгънәсен аңламавы яки алар белән идарә итә алмавы дигән сүз. Мондый кеше исеменнән, аның мәнфәгатьләрен кайгыртып опекуны эш итә (төрле килешүләр төзегәндә, шул исәптән тормыштагы вак-төяк килешүләр дә), шуңа күрә пенсиясен дә опекуны ала. Шуны да катгый белергә кирәк: алимент суммаларына, пенсия акчасына, пособиеләргә һәм инвалидны карау өчен бирелә торган башка түләүләргә опекуннарның милек хокукы юк.

Моннан тыш, опекунның эшчәнлеген опека һәм попечительлек органнары контроль астында тота. Ул, хезмәткә яраксыз дип табылган гражданны асрауга киткән чыгымнар турында әлеге оешмалар каршында хисап ясарга тиеш. Әгәр дә мөмкинлекләре чикле кешене кабат эшкә яраклы дип табалар икән, аның өстеннән билгеләнгән опека да, суд карары нигезендә, кире кагыла.