Быстровлар гаиләсе - Россия рекордлар китабына кергән беренче яшел үзәнлеләр

Бу эш өч ел элек гаилә башлыгы интернет киңлекләрендә өй шартларында келәмнәр ясау процессы күрсәтелгән роликны карагач башлана. Игорь бу идея белән «яна» башлый. Мария искә төшергәнчә, ике ай диярлек гаиләдә келәмнәр турында гына сөйләшкәннәр, фикер алышканнар. Тәвәккәлләргә булалар, Игорьга әти-әниләре дә ярдәм итә. Җиһазлар һәм материаллар сатып алына, эш гөрли башлый. Иң беренче келәм хәзер Быстровларның ике искиткеч кызының бүлмәсен бизи.

– Безнең беренче келәм балаларга бик ошады, без аны беркемгә дә бирмәскә булдык. Әйе, ул ялгышлыклар белән тегелде, чөнки без әле күп кенә нечкәлекләр турында белми идек, әмма шуңа да карамастан ул, мөгаен, иң кадерлеседер, - дип сөйли Игорь.

Ә менә рекордсмен келәм өч атна чамасы ясалды. Аңа 10 километрга якын җеп китте. Быстровлар көндез дә, төнлә дә эшли. Келәм Казанның спорт киемнәре кибетләренең берсенә каралган була. Ә инде Россия рекордлар китабында келәм-гигант турында белдерү идеясе Мариянеке. Ул шартларны озак өйрәнә, бу өлкәдә алар беренчеме юкмы булуларын ачыклый. Нәтиҗәдә, мондый рекордны беркем дә куймаган булып чыга.

– Әллә ни өметләнмәдем. Күп дигәндә китапны төзүчеләр безнең «рекорд»ка карап елмаерлар дип кенә уйладым. Ләкин без ялгышканбыз. Бер-ике атнадан соң миңа электрон почтага уңай карар белән җавап килде! Тагын бер ай көттек һәм безнең мәкалә чыкты. Рекорд болай теркәлгән – «Россиядә иң зур тафтинг келәм». Шатлыкның чиге юк иде! Ә иң күңеллесе, без Россия рекордлар китабына кергән беренче яшел үзәнлеләр, – дип уртаклаша Мария.

Хәзер Быстровлар гаиләсенең заказлары күп. Ә буш вакытларында алар әллә инде Гиннесс рекордлар китабына үзләрен тәкъдим итәргәме икән дип тә уйлый.