Бүген – Бөтендөнья Йокы көне

Фәридә Сәгъдиева, Яшел Үзән:

- Йокы ул Аллаһының кешегә ял итү өчен биргән нигъмәте. Йоклаган вакытта төшләр күрүдә без белеп бетерә алмаган ниндидер мәгънә, хикмәт бар. Мөхәммәт пәйгамбәр (с.г.в.) төшләр турында әйтеп, мондый аңлатма бирә. Төшләр өч төрле була: рахмәни, нәфсәни һәм шайтани. Начар төшләр күрмәс өчен, йокы әдәпләрен белергә кирәк: иртәрәк ятарга (кичке 11дә), йокларга ятар алдыннан күп ашамау, тәһарәт алу, уң якка ятып, уң кулны яңак астына куеп йок­лау, ишекләрне «бисмилла» әйтеп ябып, дога укып яту. Мин үзем, мәсәлән, шушы кагыйдәләрне үтәгәч, тыныч кына йоклап китәм, шөкер.

Гүзәл Гыйләҗева, Күгәй, хисапчы:

- Күп йоклаган саен йокы килә бит ул. Мин үзем иртәнге биштә торам. Мал-туарны карап, эшләремне бетереп кергәндә җиденче киткән була. Көнозын йокы килеп интегәм дип әйтә алмыйм, үземне яхшы хис итәм. Кичен сәгать унда ятарга тырышам. Кичке йокыны иртәнгесенә караганда файдалырак дип тә ишеткәнем бар.

Ләйлә Хәбирова, Яшел Үзән:

- Кичен иртәрәк ятарга тырышам. Ни өчен дигәндә, иртән торасы җиңел, сәламәтлек өчен дә файдалы. Көнозын үзеңне рәхәт хис итәсең, чөнки күп нәрсә ничек йоклавыңа да бәйле бит. Көндез йоклауга тискәре карыйм. Бер ятсаң, торасы да авыр, аннан баш кына авырта. Һәрнәрсәнең үз вакыты, шулай ук йокының да.

Рамил Садыков, «Яшел Үзән пассажир автотранспорт предприятиесе»нең директоры:

- Йокы - ул язга, җәйгә, кышка карамый, минемчә. Эштә барысы да тыныч, гаиләдә татулык булса, тыныч йоклыйм. Эштән арып кайткан чак­ларда ничек йоклап киткәнемне үзем дә сизми калам әле. Яз көне йокымсырап йөри торган кешеләргә витаминнар җитмидер ул, шуннан интегеп йөриләрдер, мөгаен.