Бер тикшерүдә 10 машина йөртүче тотылган

ЮХИДИ хезмәткәрләре кагыйдә бозуларга юл куймау, юл фаҗигаләре чыгуларны кисәтү максатыннан, ел дәвамында профилактика чаралары уздырып тора. Менә шундыйларның соңгысы, «Куркынычсызлык каешы» дип аталганы кысасында, инспекторлар 11 июньдә шәһәрнең Яшьләр һәм Каюм Насыйри урамнарындагы юлларда йөрүчеләрне тикшерергә чыккан. Нәтиҗәдә, 10 машина йөртүче куркынычсызлык каешын эләктермәгән булган. Әлбәттә инде, аларга хәзер әлеге тәртипсезлекләре өчен җавап бирергә туры киләчәк. Штрафлар аз түгел. Җитмәсә, вакытында түләмәсәң, суммасы артып торачак.

Шулай ук, бер автомобильче баласын куркыныч астына куеп, махсус креслога утыртмыйча гына юлга кузгалган. Кем белә бит, юлда бер-бер хәл килеп чыкмас дип. Моңа беркем дә гарантия бирә алмый. Берсе, исә, хәрәкәт вакытында кесә телефоныннан сөйләшеп барганда тотылган.