28 апрель көненә һава тоышы

Фото: "ЯҮ" архивы

Бүген, 28 апрельдә, республикада һава торышы тагын начарланачак. Бу хакта Татарстан Гидрометеорология үзәге белгечләре кисәтә. 

Явым-төшем: Төнлә һәм көндез яңгыр һәм җепшек кар явачак. 

Җил: Көньяк-көнбатыштан һәм көньяктан исүче җилнең тизлеге урыны белән секундына 15-20 метрга җитәргә мөмкин. Кичке сәгать 18:00дән 21:00гә кадәр кайбер районнарда җилнең көче секундына 26 метрга кадәр җитәчәк!

Һава температурасы: Төнлә республикада 0…+3 градуска кадәр суытачак. Көндез һава +5…+10 градуска кадәр (башкалада +5…+7) генә җылыначак.

Көчле җил вакытында игътибарлы булыгыз! Тәрәзәләрне яхшылап ябыгыз, урамда агачлар, реклама щитлары һәм электр линияләре янында басып тормагыз. Юлларда да саклык чараларын күрегез!