18 мартта 90 яшьлеген тутыручы Александр Угаров: “Бер тапкыр да калдырганым юк!”
Ике бәйрәмнең бергә туры килүен күр әле! 2018 елның иң мөһим датасы, илебез өчен зур вакыйга – РФ Президентын сайлау көнендә якташыбыз, Яшел Үзәндә гомер итүче Угаров Александр Николаевичка 90 яшь тула.
Александр Николаевич Лаеш районының Рус Саралы авылында туып үсә. 4 сыйныф тәмамлый. 1974нче елдан алып, лаеклы ялга чыкканчы Серго исемендәге заводта эшли, хезмәт стажы – 38 ел. Хезмәт ветераны, хатыны белән дүрт ул тәрбияләп үстерәләр. Бүгенге көндә үзе генә гомер итсә дә, якыннарының җылысын, кадер-хөрмәтен тоеп яши. 16 оныгы, 12 оныкчыгы “бабай” дип өзелеп тора, гел килеп, ярдәм итеп торалар. Инде олы яшьтә булса да, юбилей көнендә Александр Николаевич гражданлык бурычын үти.
-Үз гомеремдә бер тапкыр да калдырганым юк! Ничек итеп сайлауда катнашмыйсың да, тавышыңны бирмисең ди?! Бүген дә улым белән сайлау участогына барып, күңелем кушкан кандидат өчен тавыш бирәчәкмен, - дип сөйли әңгәмәдәшем.
Көр тавышлы, балаларының, оныкларының киләчәгенә битараф булмаган юбилярга бары тик сокланып, киләчәктә сәламәтлек теләп калабыз.
Следите за самым важным и интересным в Telegram-каналеТатмедиа
Нет комментариев