15 яшьлек малайны анасын балта белән чабып үтерергә нәрсә этәргән?!

Мәскәү өлкәсендә 15 яшьлек малай анасын балта белән чабып үтергән. Моңа кадәр ул берничә көн рәттән компьютерда уйнап утырган.

Үсмер җинаяте турында хокук саклау органнарына үзе хәбәр иткән. Сергиев Посад шәһәре янындагы Красная сторожка авылында 6 ноябрьдә иртән-иртүк ул анасын вәхшиләрчә үтерә.

«Яхшы гаилә, мәрхүмә хатын уңышлы фирмада хисапчы булып эшли. Малайны танышлары тыныч, өйдә утыра торган дип искә ала, дуслары аз була, начар укымый», – дигән сайт чыганагы.

Соңгы вакытта үсмер анасы белән талаша. Әни кеше улының компьютер уеннары белән бик мавыгуына зарлана. Бала сәгатьләр буена монитор каршында утыра.

«Соңгы атнада ул мәктәпкә йөрми, баш авыртуга зарлана, ләкин үзе иртән компьютер артына утыра», – ди сайт чыганагы. Аның сүзләренчә ана белән малай соңгы тапкыр нәкъ шул сәбәпле талашкан.

6 ноябрьдә иртән үсмер ишегалдында балта ала, әнисе йоклый торган бүлмәгә керә һәм аны чаба башлый. Яраланган хатын урында ук үлә. 15 яшьлек үсмер исә юына һәм полиция бүлегенә китә.

Үтерү турында үсмер үзе хокук саклаучыларга сөйли, аннары аны тоткарлыйлар. Хәзер аның белән тикшерүчеләр эшли.

Хәзерге вакытта балага «шикләнелүче» статусы бирелмәгән, гаепләү белдерелмәгән. Тикшерүчеләр аның күрсәтмәләрен өйрәнә.

Россиядә зур җинаятьләр, шул исәптән үтерү, өчен җинаять җаваплылыгы 14 яшьтән башлана.

Интертат