02 Эчке эшләр бүлегендә 45 җинаять очрагы теркәлгән

17 җинаять ачылган. 17есе – «кайнар эздән». 1 талау, 15 урлау, 1 тапкыр транспорт чарасын урлап алып китү, 19 мошенниклык, наркотикларның законсыз әйләнеше буенча 2 очрак теркәлгән.

Комаров урамындагы барның бәдрәфендә 40 яшьлек хатын-кызның кәрәзле телефоны таланган. Моны элек хөкемдә булган 26 яшьлек хатын-кыз кылган.

Осиновоның Осиновская урамында 47 яшьлек ирнең «ВАЗ-2104» автомобилен урлап алып киткәннәр. Икенче көнне бу машина төзек хәлдә Мамадыш районы автомобиль юлының 962нче чакрымында табылган.

«Вайлдберриз» склад комплексыннан 76092 сумлык алтын бизәнү әйберләре урланган. Моның буенча Волжскида яшәүче, элек хөкемдә булган 25 яшьлек ир шик астына алынган.

Зур Ключи авылында яшәүче 39 яшьлек хатын-кыз­ны мошенниклар мессенджер аша спорт ставкасында җиңдең, дип алдаган һәм нәтиҗәдә 389900 сум акчасын алган.

Новопольскийда яшәүче 43 яшьлек ир «Авито» сайтында мини-трактор сатуны тәкъдим иткән билгесез кешегә ышанып, 267 мең сум акчасын югалткан.

Йошкар-Ола – Яшел Үзән юлында Волжскида яшәүче, беркайда да эшләмәүче 40 яшьлек ир-ат йөртүендәге «Пежо-408» автомобиле тоткарланган. Аның пассажиры – Волжскида яшәүче, беркайда да эшләмәүче 34 яшьлек ирдән наркотик матдә табып алынган.