Яңа сәхифә

Әлфия Йосыпова, «Сетевая компания» ачык акционерлык җәмгыятенең Идел буе электр челтәре» предприятиесе ашханәсенең производство мөдире.
- Әлфия ханым, көн саен иртә таңнан Васильеводан Казанга барып эшләп йөрисе җиңел түгелдер?
- Вахта автобусы йөртә, ә ирем Илшат - автобус шоферы.
- Икең көн-төн бергә, кыен түгелме?
- Төрле ва­кыт була.
- Бу көннәрдә бөтен кеше акчам югала дип шаша. Сез нишләттегез?
- Янды инде. Декабрь башында кече улыбыз Ралиф армиягә китте. Ни әйтте: «Йөрмәгез бу иске машинагызда, яңасын алыгыз!» - диде. Тыңламадык. Бөтен эшләгән акчасын һәм үзебезнекен дә җыеп, кассага салып куйдык. Ярар, Аллаһ язмаган эш булмас!
- Татэнерго начальниклары нәрсә ашарга ярата?
- Менә ышанмассыз инде: алар безгә караганда да гадиерәк туклана. Безнең ирләргә бит инде кыш көне каклаган казын да, ат итен дә, койкасын да, тутырган тавыгын да подавай! Ә алар яшелчә, төрле ярмаларга өстенлек бирә.

Фирменный ризыгыгыз
нинди?
- Ит бәлеше. Мактанып әйтүем түгел, мин пешергәнне барысы да мактый-мактый ашый, рәхмәт төшкерләре! Яңа Ел табынына апельсин яки лимон бәлеше пешереп карагыз әле!

Лимон (апельсин)
бәлеше
Башта апара әзерлибез. 1 аш кашыгы коры яки 50 гр яңа чүпрәне, 2 чәй кашыгы шикәр комын, 1 ярым аш кашыгы онны ярты стакан сөттә болгатып, җылы урынга куябыз.
Камыр. 250 гр атланмай өстенә 2 стакан ярым он, азрак тоз салып, пычак белән кискәләп камыр басабыз.
Аннары шушы камырны вулкан кратеры сыман ясап, өстенә апара коябыз һәм барысын бергә изеп, камыр ясыйбыз.
Эчлек. Төшләре алынган 1 апельсинны кабыгы белән иттарткыч аша чыгарып, 1 стакан шикәр комы салып болгатабыз (лимон бәлеше эчлеге өчен: лимон + 1 стакан шикәр комы +1 йомырка).
Искәрмә: шикәр комын камыр әзер булып, эчлекне салганда гына эчлеккә өстәргә кирәк.
Бәлешне ясап куйгач, 30 минут тотып торабыз да (ул матур булып күперә), духовкага тыгабыз. Тәмле булсын!

Гүзәл МИНҺАҖЕВА