Исак авылында автомобильчене талаганнар

Яшел Үзән районындагы Исак авылында урнашкан "Алан" кафесына юлчылар еш туктала. Кафеның федераль юл буена урнашуы, биредәге хезмәт күрсәтүнең сыйфаты яхшы булганга күрәдер мөгаен, монда ерак юл йөрүчеләр куна кала. Мондый урыннарда җинаятьчеләр дә йоклап ятмый. Күптән түгел генә төнге бер белән ике арасында Удмуртия ягыннан килүче "Мерседес" автомобиле хуҗасын билгесез кешеләр кыйный һәм әйберләрен - кесә телефонын, автомобиль навигаторын, 102 700 сум акчасын, машина йөртү таныклыгын һәм саклык банкы картасын талап ала.

Яшел Үзән эчке эшләр идарәсе хәбәр иткәнчә, әлеге җинаять кылуда элек тә хөкем ителгән Карамалы Тау кешесе шик астына алынган.