Бөек сугыш рядовое

Җиңү көне якынлашканда

Яшел Үзәндә күченеп кайткан һәм юкка чыгарылган предприятиеләр ветераннары советы 15 ел буе эшләп килә. Бүген аның составында 100дән артык кеше исәпләнә.

Алар арасында Ленинград блокадасында булучы, Социалистик хезмәт герое, тыл хезмәтчәннәре, сугыш толлары бар. Бигрәк тә Бөек Ватан сугышын күргән кешеләр аерым игътибарга лаек. Еллар узган саен аларның саны да кимегәннән кими генә бара.

Сафта Бөек Ватан сугышында бер генә катнашучы бар – Ибраһим Вәлиев. 10 гыйнварда аңа 96 яшь тулды. Ул исән һәм хәзер зур түземсезлек белән Җиңү көнен көтә. Аның турында без бик күп яздык инде. Әмма алар турында күп язарга һәм онытмаска, аларга хөрмәт күрсәтеп торырга кирәктер дип уйлыйм.

Ибраһим Вәлиев 1927 елда туган. Аңа 13 яшь тулганда гаиләсе Сахалинга күченеп киткән. Яшьтән үк авыр эшкә күнеккән авыл малае пекарняда эшли. 1945 елның июлендә Ибраһимны хәрби хезмәткә алалар. Ул вакытта СССР Германия союзнигы – Япониягә сугыш игълан итә. Яшь солдат бишенче укчылар бригадасы составында зенит артиллериясендә хезмәт итә. Көньяк Сахалин өчен сугышларда катнаша. Ибраһим «Японияне җиңгән өчен» медале, Бөек Ватан сугышы, «Кызыл Йолдыз» орденнары, «1941-1945 еллар фронтовигы» билгесе һәм башка юбилей медальләре белән бүләкләнә.

Сугыштан соң Ибра­һим Вәлиев Сахалинда газ чыгару операторы булып эшли, «Коммунис­тик хезмәт ударнигы» билгесе белән бүләкләнә. Яшел Үзәндә ул 1978 елдан бирле яши. Ибраһим абыйның өе чиста, каралган, янына дуслары, күршеләре, туганнары һәм без – ветераннар советы активистлары килеп тора.

Без аңа ныклы сәла­мәтлек, шатлык-куанычлар телибез! Шундый кешеләр озын-озак яшәсеннәр иде әле.

Ринат Шәрипов,
Яшел Үзәннең күченеп кайткан һәм ликвидацияләнгән предприятиеләр ветераннары советы рәисе.