Яңа ел табынына әфлисунлы үрдәк әзерлибез

Яңа ел табынына куеласы сый-нигъмәтләр турында уйлана башларга вакыт. Әфлисунлы үрдәк нинди генә бәйрәмнең дә яме булачак.

Ә ул болай әзерләнә: үрдәкне кичтән үк маринадларга кирәк. Моның өчен 2 аш кашыгы бал, 3-4 кашык соя соусын, калак очында аджика, тоз, борыч, вак кыргычтан чыгарылган 4-5 тырнак сарымсак, ярты әфлисун сутын бергә бутап, үрдәкнең эчен-тышын ышкыгыз. Ул шулай иртәнгә кадәр салкынча урында торсын.
Мичкә куяр алдыннан үрдәк эченә әчкелтем-баллы алма һәм әфлисун кисәкләре тутырыгыз. Ә аннары фольгага төреп, 200 градуста 1,5 сәгать пешерегез. Соңыннан фольганы ачып, калган маринадны үрдәк өстенә сылап, янә 20 минут кызартып алыгыз.

Чыганак - фото: Авыл хатыны/Сельчанка