Грузин соусы «Сацебели»

Интернетта аның күп төрлеләре бар, әмма без редакциябез белән нәкъ менә түбәндәгесен үз иттек. Сез дә иренмичә ясап, авыз итеп карагыз әле, бәлки, аннары, фикерләрегезне дә җиткерерсез.
- 4 литр томат согы (1 стаканын әлегә кырыйга алып куеп торабыз)
- 5 данә татлы борыч
- 2 баш сарымсак
- 2 данә ачы борыч
- 2 стакан шикәр комы
- 2 аш кашыгы тоз
- 6 бал кашыгы төелгән кориандр
- 2 бал кашыгы төелгән кара борыч
Борычлар һәм сарымсакны иттарткычтан чыгартабыз һәм алдан санап үтелгәннәрнең барысын да кушып 15 минут пешерәбез. Аннары 1 бәйләм (пучок) петрушка, 1 бәйләм укроп, 1 бәйләм базиликны турап  кушылмага өстибез һәм 5 минут кайнатабыз. Алдан алып куелган 1 стакан томат согына 4 аш кашыгы крахмал салып болгатабыз – шуны һәм 1 стакан аш серкәсен дә катнаштырабыз да, тагын 5 минут пешерәбез. Кайнар килеш банкаларга тутырып, капкачлап куябыз. Тел йотарлык соус әзер.