Барысы да – 5!

Заманында мин дә  кышка бик тәмле  салатлар ясап куя идем. Хәзер олыгайдым әле. Әмма кайбер  тәмле рецептлар хәтердә сакланган.

Мин яратып әзерли торган «Лечо» салатына түбәндәгеләр кирәк:
5 данә помидор,
5 данә баллы борыч,
5 данә  баклажан,
5 данә суган,
5 данә кишер,
2-3 аш кашыгы  тоз,
1 десерт кашыгы серкә эссенциясе,
4-5 аш кашыгы  шикәр комы (лечоның баллырагын яратам),
150-180 мл  үсемлек мае, борчаклы кара борыч, дәфнә яфрагы.
Помидорларыгыз итләч булса, 1-2 стакан су  салырга да мөмкин, чөнки мондый помидорлар суны аз бүлеп чыгара.
Бөтен яшелчәләр дә бер күләмдә, зурлыкта булырга тиеш. Тирән кәстрүлгә май салабыз, 10-15 минут помидорларны кыздырабыз, аннары кишерне – 20, суганны – 15, баллы борычны – 10 минут кыздырабыз, бары тик соңыннан гына  баклажанны салып, 8 минут кыздырып алырга  кирәк.  Баклажанны тиз-тиз кыздырырга,  артык  пешеп китмәсен. Аннары инде бөтен тәмләткечләрне салып, 3-4 минут кайнатып алабыз да  банкаларга тутырып, калай капкач белән  ябып куябыз. И тәмле дә була инде, кызларым, ясап карагыз әле!