Тамчылар тамар, ташулар агар чак

Республика буенча кар запасы климатик нормадан югары. Моннан тыш кышның иртә килүе һәм тотрык­лы булуы карда су запасы җыелуга китерде. Кар катламы кырларда 25-50 см, ә Идел һәм Зөя елгасында боз калынлыгы 35-37 см, урыны белән 50 смга кадәр тәшкил итә. Әлеге саннарны ТР Гражданнар оборонасы эшләре һәм гадәттән тыш хәлләр министрлыгының Яшел Үзән районы буенча җитәкчесе Вячеслав Долганов эшлекле дүшәмбе киңәшмәсендә җиткерде. Идел-Кама сусаклагычы каскады эшчәнлеген көйләү буенча ведомствоара эшче төркем биргән мәгълүмат буенча, 2017 елгы язгы ташу чорында сусаклагычта күләм иң югары ноктага - 212 куб. км. га җитеп, куркыныч тудырырга мөмкин. Моңа кадәр ташу вакытында 200 куб. километрдан артык - 1966, 1979, 1994 елларда теркәлгән булган. РФ МЧС «Антистихия» мониторинг һәм фаразлау бөтенроссия үзәге фикеренчә, безнең республика югары хәвеф-хәтәр зонасына керә һәм гадәттән тыш су басу күзәтелергә мөмкин.

- Соңгы өч елда язгы ташу чоры Яшел Үзән районы өчен тыныч узды. Тик шулай да аерым бер проблемалар теркәлде. 2016 елда кечкенә елгалар боздан 24-29 мартта арынды. Гөбенә елгасының максималь артуы узган ел 5-13 апрель чорына туры килде. Татар Танаеның берничә бакчасын, каралтыларны су басты, - дип сөйли җитәкче.

Күңелсез хәлләрне булдырмый калу максатыннан, әзерлек эшләрен бүгеннән күрергә кирәк.

Мамадыш-Әкилдә субүлгеч каналларны, Бакырчыда узган елгы хәл кабатланмасын өчен, Укша елгасын чистартып, тирәнәйтергә кирәк.

- Язгы су ташуның бервакытта да бер-берсенә охшаганы юк. Шуңа да барысына әзер булу мөһим. Һәр хуҗалык кар суыннан зыян күрмәс өчен хәстәрен күрер­гә тиеш, - дип ассызыклады район башлыгы Александр Тыгин.

Әлегә көннәр салкынча торса да, вакыт белән кыш чигенәчәк. Язгы боз ястык калынлыгы булса да, ышанма ди халык. Елга-күл буйларында сак булсак иде. Сакланганны саклармын дигән Ходай.