Кычытканлы балык ашы

Бакча тирәсендә, зарыгып көтеп алган кызу эш көннәре башланды! Шунда кайнашканда күз төшкән яшь кычытканнарны тиз генә өзеп, булган консерв банкасын ачып (туңдыргычка чис­тартып тыгып куйган чуртан яки алабуга балыгы булса да бик әйбәт), ярты сәгать эчендә җәлт кенә аш әзерләп алыйк. Эш – эш белән, ә әбәд үз вакытында бит!

Кирәк: (ингредиентларның күләмен күрсәтеп тормыйбыз, һәркем үзенчә алсын)

• Майлы яки натураль согында балык консервысы
• Бәрәңге
• Кычыткан
• Башлы суган
• Кишер
• Яшел үләннәр
• Тоз
• Йомырка
• Үсемлек мае

Кычытканны бераз тозлы суда тотыгыз, аннары юып, турагыз. Суган белән кишерне үсемлек маенда кыздырып, кычытканны да шулар янына кушып, биш минутлап акрын утта пешерегез. Аннары 1,5 л кайнаган су һәм бәрәңге салып, ун минутлап кайнатыгыз. Балыкны да кушып, тәменчә тозлагыз. Туралган петрушка, кыяк­лы суган, укроп кебек яшел үләннәр өстәгез. Соңыннан, йомырканы яхшылап туглап, шулпаны болгатып торып, агызыгыз. Кайнап чыккач, уттан алыгыз.

Бик тәмле һәм җиңел аш әзер!