«Ураза һәм Коръән кыямәт көнендә Аллаһ колын яклаучылар» (хәдисләр)

«Әгәр Рамазан ае буе ураза тоткан мөселман киләсе Шәүвәл аенда тагын алты көн ураза тотса, яңа туган сабый кебек гөнаһсыз булачак» (Әт-Табарани).

«Әгәр дә берәрегезнең гадәти ураза тоту көне аңа туры килми икән, догалар уку һәм ураза тоту өчен җомга төнен башка төннәрдән, җомга көнен башка көннәрдән аерып куймагыз» (Мөслим).

«Ураза тоту – ул калкан һәм ураза тотучы әдәпсезлекләрдән читтә торсын, үзен наданнарча тотмасын, әгәр берәрсе аның белән талашырга тырышса яки аны орышса, мондыйга ике тапкыр: «Мин ураза тотам!» дип әйтсен (Әл-Бохари).

Мөхәммәд пәйгамбәр әйтте: «Ураза һәм Коръән кыямәт көнендә Аллаһ колын яклаучылар. Ураза: «И, Раббым! Мин аны көн яктысында ризыктан һәм эчүдән мәхрүм иттем, шулай булгач, миңа аны якларга рөхсәт ит!» – дияр. Ә Коръән: «И, Раббым! Мин аны төнлә йокысыннан мәхрүм иттем, шулай булгач, миңа аны якларга рөхсәт ит!» – дияр. Һәм аларның яклавы канәгатьләндерелә» (Әхмәд).

«Чыннан да, җәннәттә «Әр-Раййан» дип аталган капкалар бар, алар аша Кыямәт көнне ураза тотучылар керәчәк һәм бу капкадан алардан башка беркем дә узмас. «Ураза тотучылар кайда?» – дигән сорау бирелгәч, алар күтәреләчәк, ә алар кергәч, бу капкалар ябылачак һәм алар аша бүтән беркем дә узмаячак» (Әл-Бохари).