Яшел Үзәннең Җәмигъ мәчетендә «Мөхәммәд пәйгамбәр – әхлакның иң бөек үрнәге» дип исемләнгән Халыкара XII балалар бәйгесенә йомгак ясалды

Россиянең төрле төбәкләреннән һәм якын чит илләрдән булган яшьләрне берләштерүче иҗади проектта катнашучылар саны елдан-ел арта. Беренче елны 58 бала катнашкан булса, соңгысында оештыручылар 764 гариза алган.

Һәм максатлары – балалар Пәйгамбәр мисалында үз мөнәсәбәтләрен, әхлакый карашларын белдерсен, алардан башкалар да үрнәк алсын. Шулай итеп, 4тән 16 яшькә кадәрге балалар Пәй­гамбәрнең тормышына, шә­хе­сенә багышлап шигъри әсәрләрен тәкъдим иткән. Бу иҗади мөмкинлекләрен үстереп кенә калмый, ә Ислам кыйммәтләрен ныграк аңларга һәм төрле милләтнең гореф-гадәтләренә хөрмәт белән карарга өйрәтә.

– Быел әлеге бәйгедә Яшел Үзәннән 19 бала катнашты. Видеороликлар төшереп, оештыру комитетына юлладык. Балалар хәдисне өйрәнеп кенә калмыйча, аны тормышта ничек кулланырга кирәклеген дә аңларга тиеш. Менә бу – иң мөһиме. Аннан, бу чара үсеп килүче буынны дини, әхлакый, иҗади яктан тәрбияли. Балаларның катнашуы үзе бер җиңү. Нәтиҗә ел ахырында ясалды, Төмәннән дипломнарны алдык һәм акчалата бүләк белән аны Рамазан аенда тапшыруыбыз үзенә күрә бер шатлык. Балаларны сөендергән иганәчеләргә рәхмәт, – дип җиткерде «Җәмигъ» мәчете хезмәткәре Эльвира Камалиева.