Фитыр сәдакасын биргәч нинди дога укырга кирәк?

Фитыр сәдакасының асыл-максатыннан чыгып, аның гаеткә кадәр тапшырылуы шарт булып тора. Хәдистән мәгълүм булганча, фитраны тапшырмаган кешенең уразасы кабул булмыйча  җир белән күк арасында эленеп торыр... Фитырның вакытында бирелүе исә уразадагы кимчелекләрнең ярлыкануына һәм әлеге зур, әһәмиятле гыйбадәтнең кабул ителүенә мөһим сәбәп булып тора.

Фитыр сәдакасы догаларына килгәндә, биредә китерелгән рәсемдә шуларның кыска үрнәкләре китерелә.
ФИТЫРНЫ БИРЕР АЛДЫННАН бирүче кеше туган телендә тәфсиллебрәк шундый ДОГА да кыла ала:

Ә(г)үүзү билләәһи минәшшәйтаанирраҗиим Бисмилләһир-рахмәәниррахиим.
Йә Раббым! Фәкать бер Үзеңнең ризалыгың өчен вәҗеб булган фитыр сәдакасын бирергә ният кылдым. Шушы сәдакамны кабул итеп, аны Рамазан ае дәвамында кылган гыйбадәтләремнең кабул ителүенә сәбәп кыл. Гөнаһларымны, бәндәчелек белән кылган хата-кимчелекләремне ярлыка, бу дөньяда да, ахирәттә дә Үз рәхмәтеңдә булуымны насыйп әйлә.
Раббәнәә әәтинәә фиддүнья хәсәнәтәү үә филь әәхыйрати хәсәнәтәү үә кыйнәә гәзәәбәннәр. Бирахмәтикә йә әрхәмәрраахимиин.  Әәмиин.

ФИТЫРНЫ АЛУЧЫ КЕШЕ шундый ДОГА да кыла ала:
Ә(г)үүзү билләәһи минәшшәйтаанирраҗиим Бисмилләһир-рахмәәниррахиим.
Йа, Раббым, ошбу фитыр садакасын алдым.  Биргән кешенең шушы сәдакасын изге гамәлләрдән кабул итеп, тиешле әҗәр-савапларың белән бүләклә. Сәдака бирүченең гөнаһларын, хата-кимчелекләрен гафу ит, кылган яхшы гамәлләрен, гыйбадәтләрен кабул ит. Үзенә, гаилә әһелләренә саулык-сәламәтлек, иминлек-тынычлык, рәхмәт-бәрәкәт, бәхет-сәгадәт биреп, барысын да тәүфикъ-һидәят юлында булучы ихласлы мөселманнардан кылсаң иде, йә Раббым!
Раббәнәә әәтинәә фиддүнья хәсәнәтәү үә филь әәхыйрати хәсәнәтәү үә кыйнәә гәзәәбәннәр. Бирахмәтикә йә әрхәмәрраахимиин.  Әәмиин.

Ришат хәзрәт Курамшин әзерләде