Май

Май башында шундый гүзәллектән
Баш әйләнә, йөрәк ярсына,
Күңелләрең ерак офыкларга,
Каурый болытларга ашкына.

Чәчкәләрдән затлы хушбуй булып
Тирә-юньгә исләр бөркелә,
Төшләргә дә ямьле май төнендә
Үткәннәрдә калган май керә...

Бал кортлары кунып чәчкәләргә
Шатландыра бугай хуҗасын,
Икәү бергә шулай тарта алар
Бик тырышып тормыш «нужа»сын.

Күбәләкләр кояш нурларында
Шатланышып әнә коена,
Очып аргач ял итәргә теләп,
Алмагачка килеп сыена.

Шау чәчәкле авыл бакчалары 
Гүзәллеккә бүген күмелгән,
Читән буйларында яшь кычыткан,
Кояшкайга ул да үрелгән.

Ирек Сафин.
Олы Шырдан