Эчке эшләр бүлегендә 44 җинаять теркәлгән. Шуларның 18е – шәһәрдә, 26сы – районда булган

Бергә спиртлы эчемлекләр кулланып кәеф-сафа корганнан соң, тавыш чыгып, Осиновода яшәүче 37 яшьлек хатын йортка кергән ирнең бил тирәсен пычак белән яралый. Ир реанимациягә эләгә.
Васильево бистәсе тирәсендәге Идел яры буеннан баш мие җәрәхәте белән бистәдә яшәүче 67 яшьлек ир табыла һәм хастаханәгә китерелә. Аңында булмаганлыктан, вакыйгага ачыклык кертү мөмкин түгел.
Челтәр кибетләреннән товар урлаучылар үз репертуарында, сәүдә нокталарыннан күпчелек спиртлы эчемлекләр «аяклана» икән.
Васильевода яшәүче 87 яшьлек карчыкның үз акчасына сатып алынган 1500000 сумлык фатирын 55 яшьлек ир үзенә рәсмиләштергән.
Билгесез зат, Карамалы Тауда яшәүче 53 яшьлек ирнең кредитын ябам, дип алдалап, 508 мең сум акчасын үзләштергән.
Дубровка бистәсе янындагы урманда үлән арасында 497,77 гр n-Метилэфедрон наркотик матдәсе табып алынган. Аның Казанда яшәүче 22 яшьлек кызныкы булуы ачыкланган. Ул аны алга таба сату нияте белән яшергән.