Яшел Үзән

Туфан Миңнуллин "Кызлар кызык итәләр" әсәре буенча Түбән Кама дәүләт татар драма театры артистларының чыгышын карап хозурланып кайттым

Яшел Үзәнгә Туфан Миңнуллин исемендәге Түбән Кама дәүләт драма театры гастрольгә килде. "Кызлар кызык итәләр" постановкасына көндез сыйныф белән минем кызым барды, ә кичен без.

Спектакль яшьләрне дә, безне дә шатландырды. Ике сүз белән сөйләгәндә, эчтәлеге болайрак: бераз акча эшләү максаты белән авылга студентларның төзелеш отряды килә. Өч егет бер-берсенә тырышып эшләячәкләре, гашыйк булмаячаклары турында бер-берсенә сүз бирә һәм... әлбәттә инде, вәгъдәләрендә тора алмыйлар.

Спектакльнең режиссеры - Татарстан Республикасының халык артисты, Татарстанның атказанган сәнгать эшлеклесе, Марсель Сәлимҗанов исемендәге премия лауреаты Рөстәм Галиев.

Спектакль миңа ошады, кайбер мизгелләрне әлегә кадәр күңелемдә кичерәм һәм авызым үзеннән-үзе ерыла. Ә актерлар уены, аларның осталыгы югары дәрәҗәдә иде. Комедия тәмамлангач, труппаны барысы да басып алкышлады. Спектакль уңышлы чыкты! Халык рәхмәтле иде, ләкин, кызганыч аз. Һәм мондый күренеш кәефне бозды. Күптән түгел @rff белән булган әңгәмәбезне искә төшереп әйткәндә, татар халкының мәдәниятен һәм театрларын үстерү өчен ким дигәндә спектакльләргә йөрергә кирәк, ә алар бездә искиткеч!

Иң мөһим һәм кызыклы язмаларны Татмедиа Telegram-каналында укыгыз


Нравится
Поделиться:
Реклама
Комментарии (0)
Осталось символов: