Хаҗилар кайтып җитте

2 октябрьгә каршы төндә Татарстан хаҗиларының бер өлеше туган җирләренә кайтып җитте.

Изге сәфәргә барган 98 хаҗины Казан аэропортында туганнары-якыннары, нәзарәт вәкилләре, хаҗ сәфәрен оештыручылар каршы алды, ди нәзарәтнең матбугат хезмәте.

Татарстан мөселманнары Диния нәзарәтенең дәгъват бүлеге җитәкчесе, "Апанай" мәчете имам-хатыйбы Нияз хәзрәт Сабиров һәм "Мөхәммәдия" мәдрәсәсе мөгаллиме Шамил хәзрәт Касыймов җитәкчелегендәге ике төркемнең хаҗ сәфәрләре тәмам. Киләсе төркем 4 октябрьдә, соңгы төркем 11ендә кайтыр дип көтелә.

Нияз хәзрәт хаҗ сәфәреннән алган тәэсирләре белән уртаклашып: "Хаҗ ул бик зур гыйбадәт. Барлык хаҗилар бер гаилә булып яшәделәр, бер-берсенә ярдәм иттеләр. Җитәкчеләр бик яхшы вәгазьләр сөйләделәр. Чит җирләрдә, сәфәр вакытында авырлыклар булмый калмый, Аллаһы Тәгалә һәрберебезне анда сыный. Шунысы сөенечле, безнең зур проблемалар булмады. Бөтен хаҗилар да сау-сәламәт, изге сәфәрләреннән канәгать. Барчабызның хаҗлары кабуллардан булсын!" - диде.

Фото: dumrt.ru

Мәгълүмат интертат.ру сайтыннан алынды.