Чишмәбезнең бер йотым суы...

Тәмле сулы кизләвебезнең челтерәп агучы көмештәй суы авылыбызның һәр туган баласын пакьли, юа, һәркемне шифалы суы белән чәй эчереп сыйлый, читкә киткәннәрне сагындыра, өлкәннәребез кизләү башында булган яшьлекләрен, очрашуларын сагынып искә төшерә, читкә китүче авылдашларыбыз кизләү суын юлда эчү өчен үзе белән алып китә.

Чишмә-кизләү бәйрәмебез гөрләде ул кичтә. Бәйрәмне күрергә өлкәннәр - мәчет картлары, әбиләр, яшьләр, күрше авылдан кунаклар, шәһәрдән кайтучылар да күп иде.

Бәйрәмне имамыбыз - Әнәс Мәгъсүм улы ачып җибәрде, аның хәер-догасы белән бәйрәм гөрләде, авылыбыз яшьләренең бердәмлеге, киңәшләшеп эшләүләре нәтиҗәсендә кизләү яны чәчәккә күмелгән, күл буе үзенә тартып тора, яшелләндерү өчен агачлар утыртылган, су сибүчеләр билгеләнгән.

Оештыручылар - мәдәният хезмәткәрләре, мәктәп коллективы, медик, кибетче кызлар, бик күпләр чын күңелдән халыкка хезмәт күрсәтте.

Кизләвебезне - кунак йорты кебек матурлаганнар иде.

Авылда кизләүнең йортын яңарту, күпер төзү, мәчет салдырып, сабан туйлар үткәргәндә матди ярдәм күрсәтүче Бәхтияровлар гаи­ләсен, яшелләндерү өчен агач үсентеләре кайтаруда ярдәм иткән Идрис Хәмитовне, чәчәк савытлары кайтаручы Насыйбуллиннарны, шушы матурлыкны тудыручыларны һәм мәктәп коллективын җирле үзидарә башлыгы Сәлим Шәмсиев тә билгеләп узды.