Спорт – аның яшәү девизы

Безнең мәктәптә спорт белән шөгыльләнүче укучылар шактый. Мин сезгә сыйныфташым Харисов Илһам турында язарга булдым.
Без аның белән бер сыйныфта укыйбыз. Аңа игътибар бирүемнең сәбәбе шул: ул ел дәвамында спортның ниндидер бер төре белән шөгыльләнә. Сәламәт тәндә - сәламәт акыл - аның яшәү девизы.
Мин Илһамны физкультура дәресендә чаңгы шуарга чыгып барган чагында очраттым һәм аңа берничә сорау белән мөрәҗәгать итәргә булдым.
- Илһам, спортның кайсы төре сиңа күбрәк ошый?
- Аеруча бокс, чаңгы, футболны якын күрәм.
- Безнең мәктәптә бокс белән шөгыльләнүче егетләр күп. Ул кайсы ягы белән сезне үзенә тарта?
- Шәхсән минем үземә аның техникасы ошый. Аннан соң үз-үзеңне яклау өчен дә бик яхшы ул. Минемчә, һәр ир-егет бокс алымнарын белергә тиеш.
- Ярышларда катнашасызмы?
- Әлбәттә. Әле күптән түгел генә Казанда 12-15 яшьлекләр арасында бокс буенча ярышта III урын алдым, диплом, медаль белән бүләкләндем. Мин бу җиңүемә бик шатландым, тагын шундый ярышларда катнашу теләге белән кайттым.
- Чаңгыны да якын күрәсең икән.
- Әйе, кышын чаңгы шуарга, җәен футбол уйнарга яратам. Әле шушы көннәрдә Олы Яке авылында Олимпия чемпионы Ринат Сафин хөрмәтенә узган чаңгы ярышында катнаштым.
- Сиңа уңышлар телим, Илһам.
Закирова Зәринә,
Әйшә урта мәктәбенең
VIII сыйныф укучысы