Гүзәл Уразова үзенең күптәнге хыялын тормышка ашырды

Автор, 4 май 2015 - 16:00

665

Узган ел җырчы Гүзәл Уразова үзенең күптәнге хыялын тормышка ашырып, туган ягы - Пермь өлкәсенең Барда районында "Гүзәл Уразова исемендәге кубокка өстәл теннисы ярышы"н башлап җибәргән иде. Инде быел әлеге турнир икенче тапкыр уздырылды.

Биредә урта һәм югары сыйныф укучылары белән берлектә зурраклар да катнаша. Intertat.ru хәбәрчесе әлеге турнирны оештыру идеясен, максатын һәм нинди кичерешләр алып кайтуын белер өчен Гүзәл Уразова белән элемтәгә керде.

- Гүзәл, өстәл теннисы буенча турнир уздыру уе ничегрәк туды?

- Инде күп тапкырлар искә алганымча, өстәл теннисы - минем яраткан спорт төре. Мәктәп яшеннән бирле өстәл теннисы белән шөгыльләнеп, Барда районында чемпион исемен алган идем. Гаиләмдә әти-әнием, бертуганнарым теннисны яратуымны белеп, миңа өстәл теннисы бүләк иттеләр. Ул безнең өебездә тора. Вакыт булганда уйныйм. Ә турнир уздыру фикеренә килгәндә, кечкенәдән үк туган ягымда берәр спорт төренә кагылган турнир үткәрәсем килде. Барда районы башлыгы, үзем белем алган мәктәп директоры һәм башка якташларыбыз белән киңәшләшеп, узган елны беренче тапкыр турнирны башлап җибәрдек. Без аны 4-5 категориягә бүлеп эшләдек. Биредәге турнирда мәктәп укучылары гына катнашмады. Урта яшьтәгеләр дә үзләренең категорияләрендә көч сынашты. Барлыгы 100гә якын спортчы җыелган иде. Узган елны беренче тапкыр булуына карамастан, турнир бик уңышлы килеп чыкты. Без аны ел да апрель аенда уздырып килербез дип сүз куйдык. Менә быелгысы да апрель аенда Барда район үзәгендәге 1 нче номерлы гимназиядә узды. Ул - минем белем алган мәктәбем.

- Әлеге чараның иганәчеләре бармы?

- Әлбәттә, бернинди дә иганәчеләребез юк. Теләк белдерүчеләр булса, мин каршы түгел (елмая). Барлык чыгымнарны да үзебез каплыйбыз. Быел без призлы фондны арттырдык. Шулай ук өстәл теннисы булмаган мохтаҗ мәктәпләргә теннис өстәле бүләк итәргә булдык. Төп максатыбыз - әлеге турнирда катнашучыларда, әлеге чараны бары күрергә килгән кешеләрдә дә спортка мәхәббәт уяту. Бигрәк тә балаларны спортка җәлеп итәргә теләдек. Югарырак дәрәҗәдә булуларын теләп, аларга тәрбия бирү. Урам буйлап йөрмәсеннәр. Аларның спорт белән шөгыльләнүләрен максат итеп куйдык. Иң мөһиме - әлеге турнирларга гади халыкның килүе, аларның катнашырга теләк белдерүе. Мин генә түгел, барыбыз да шулай уйлыйдыр. Чөнки мондый турнирлар уздыру районыбыз өчен үзенә күрә бер тарих

булып кала. Шуңа күрә әлеге уеннарны ел саен уздырырга тырышам. Мөмкинлек булган кадәр әлеге эшемне дәвам итәргә уйлыйм. Барда районы белән генә чикләнмичә, башка районнарга да чыгарга исәп.

- Татарстанга чыгарга уйламыйсызмы соң?

- Әлбәттә! Чөнки мин күп еллар инде Татарстанда яшим. Җаным-тәнем белән һәрвакыт Казанда мин. Алла боерса киләчәктә Казанда да уздырырга теләк бар.

- Быелгы турнирдан нинди кичерешләр алдыгыз? Катнашучылар белән аралаштыгызмы?

- Беренчедән, оештыручы буларак уеннар барганын башыннан ахырына кадәр карадым. Спортчыларның янып-көеп уйнауларына, аларның җанатарларына сокланып карап утырдым. Тренерларның турнирда катнашкан укучыларына өмет баглап торулары - үзенә күрә бер аерым кичерешләр. Монда чыннан да фанат булган кешеләр генә уйный дип уйлыйм. Әлеге спорт төренә мәхәббәтең булмаса, уйнап та булмастыр минемчә. Турнирда барган атмосфераны күрү - үзе бер бәхет. Бик күп рәхмәт сүзләрен ишетергә туры килде. "Сезне күрү үзе бер шатлык", - дип уенда катнашкан балаларның әти-әниләренең килеп әйтүләре күңелгә рәхәт инде. Хәтта чит төбәкләрдән мине күрер өчен генә килгән кешеләр дә булды. Турнирда рус милләтендәгеләр дә катнашты. Гомумән, турнирның киләчәге дәвамлы булыр дип өметләнәм. Чөнки моның өчен бик күп көч сарыф ителә. Катнашырга теләк белдерүчеләр саны елдан-ел арта икән, бу безне сөендерә генә.

Эльза Газизова.