Яшел Үзән

Көчле рухлы, кыю Ана

Һәр авылның мактауга лаек көчле рухлы, кайгыларга бирешмичә, түзем, сабыр, күп балаларын хезмәттән аерылмыйча тәрбияләп ялгыз үстергән аналары бар. Күп балалы - илгә лаеклы уллар-кызлар үстергән данлы Аналары белән безнең Бакырчыбыз да горурлана ала. Шуларның берсе - 5 ул һәм 1 кызын ялгызы үстереп, олы тормышка хәзерләгән ана - Суфия...

Һәр авылның мактауга лаек көчле рухлы, кайгыларга бирешмичә, түзем, сабыр, күп балаларын хезмәттән аерылмыйча тәрбияләп ялгыз үстергән аналары бар.
Күп балалы - илгә лаеклы уллар-кызлар үстергән данлы Аналары белән безнең Бакырчыбыз да горурлана ала.
Шуларның берсе - 5 ул һәм 1 кызын ялгызы үстереп, олы тормышка хәзерләгән ана - Суфия апа Бәхтиярова.
Суфия апаның тормыш юлы авыр, катлаулы булды. 2 яшеннән әтисез ятим калып үскән Суфия апа 7 классны бетерүгә Бакырчы фермасына дуңгызлар карарга керде. Аннан, озак еллар сыер савучы булып эшләп, пенсиягә чыкты.
Тормыш аны иркәләмәде. Юклыкның кыенлыкларын җиңәргә нинди генә көч тапты икән ул?
Яшьтән кияүгә чыгып, 5 ул һәм 1 кыз тапты. Яшьли 6 бала белән ялгыз калды. Рухулла абый вакытсыз дөнья куйды шул.
Торыр урыннары булмагач, саман йорт җиткерделәр. Аны ягып та, җылытып булмый иде. Аның салкынлыклары үзәккә үтте.
Аннары агач йорт җиткерделәр. Каралты-кура төзеделәр. Ир балалар шуклыгы белән 2 тапкыр янгын чыкты, бернәрсәсез калдылар. Олы балалары III-IV класста укыганда, кайсы авыл көтүе, кайсы колхоз көтүен көтеп, әниләренә ярдәм итә башлагач, бераз рәтләнде тормышлары. Җитешмәүчәнлекнең чиге булмады ул чакта. Туганнар, тирә-күршеләр бик булышты, рәхмәт.
5 ул! Әйтергә генә ансат. Җәй көне көтү көтәләр. Игезәк Рәшит-Рафыйкъ көн аралаш (көз көне көтү кергәнче көтүне ташлый алмыйлар, дәрес калдыргалыйлар. Мин аларның класс җитәкчесе, дәрес калдырмасыннар дип барам. Апа мине әрли, нишләсен, тормыш алып барырга кирәк. Әлфиясе белән Шамиле иртән әниләренә сыер савышырга фермага менәләр. Әлфиянең мәктәп формасы сумкасында йөрде, мәктәпкә Акъегеткә килгәч алмаштыралар иде киемнәрен.
Еллар үтә торды. Уллары-кызы кечкенәдән хезмәтнең ниндиен генә башкармадылар, язып бетерерлек түгел. Гыйбрәт өчен язам. Чөнки хәзерге балалар бик иркә үсәләр, ата-аналар артык иркәлиләр.
Суфия апаның олы улы Равил, кызы Әлфия, игезәкнең берсе - Рафыйкъ Акъегет мәктәбен бетергәч, Буа ветеринария техникумын бетерделәр. Аннан соң 5 улын армиягә озатты. «Кешечә булсын, малайларым эшләп китәләр», - дип озату кичәләрен үткәрде. Алар хезмәт итеп кайтты. Әлфия Күгәйдә ветврач булып, аннан Акъегет авыл советы рәисе булып эшләде. Рафыйкъ, ветинституттан соң, авылда ветврач, Юынчыда һәм Бакырчыда колхоз рәисе булып эшләде. Рафыйкъ Буада укыганда, акча җитмәгәч, вагон бушатып, ялгыз әбиләргә утын ватып, өйгә кайтканда чүпрә алып кайтып йөрде, акча юнәтте. Чүпрәсен кече уллары Шамил ваклап авылда сатты. Кешечә яшәү, кием юнәтү өчен ничек кенә көн итмәде алар, кайда гына эшләмәделәр?!
Бернинди хезмәттән дә чирканмадылар. Аларны иртән үзе сыер саварга киткәндә үк уятып көтүгә чыгарып җибәргәндә ана йөрәге телгәләнмәде микән? 10 яшьлек балалар бит алар ул чакта.
Гомер рәхәттә дә, кыенда да үтә ул. Кыенлыкта табылган хезмәт җимеше кадерле була. Һәр тиенен санап яшәделәр. Суфия апаның көчле рухлылыгына гаҗәпләнерлек. Кайберәүләр 1 балага туй ясый алмаганда, 6 баласына зурлап туйлап өйләндерде, кияүгә бирде.
Шул кыенлыкларны җиңеп, балалары хакын хаклаган Ана булганга, балалары олы хөрмәт белән карыйлар. Равиле Норлатта ЖКХ начальнигы булып эшли. Инде үзе бабай, оныклары бар. Навиле, Рафыйгы, Әлфиясе Сургут шәһәрендә гаиләләре белән яшиләр, җитәкче урыннарда эшлиләр. Сабан туйларын үткәрергә, мәчет-зиратны карап торырга, балалар бакчасын ремонтлауга матди ярдәм күрсәтәләр.
Суфия апаның 5 баласы да югары белемле, хәзер оныклары Казанга кайтып, институтларда белем алалар. Апа хәзер бик кадердә, рәхәттә. Юклыкны үткәргән көннәренең, авырлыкларны җиңү эзсез үтмәде инде. Саулыгы чамалы. Аны балалары ике тапкыр Хаҗ кылырга юллап җибәрделәр. Әле бер баласы, әле икенчесе илнең төрле санаторийларында ял иттерәләр, бик булышалар, кайгырталар, хөрмәт итәләр. 2 катлы зур өйдә муллыкта яши. Бәхетле ананың 5 баласы исән, 12 оныгы, 3 оныкчыгы бар. Тик гомер генә узып бара. Тиздән Суфия апага 75 яшь. Юбилее белән котлап, аңа сәламәтлек, тыныч картлык, борчусыз көннәрдә яшәвен телибез. Бар әйбере җитеш, сәламәтлек кенә телибез.
Бу язманы мактанып түгел, ә гыйбрәтле язмышлы гаилә, аның олы кешесе - 6 бала анасы, илгә 5 солдат үстергән, аларны озаткан, көтеп алган, каршылаган, батыр кыз үстергән Анага багышладым.

Һай, бу гомер...
Авырлыклар үтә-үтә,
Рәхәт тормыш көтә-көтә,
Сикәлтәле юллар узып,
Гомереңнең юлын сызып,
Кай арада үтеп киткән?!
Һай, бу гомер!

Кочак тулы бала багып,
Яшь көенчә ялгыз калып,
Бик аз булып шатлыкларың,
Ерып кайгы сазлыкларын
Кай арада үтеп киткән?!
Һай, бу гомер!

Сүнми янды синең учак.
Юклыкларың кочак-кочак
Булганда да сер бирмәдең.
Бер көнең дә үтмәс кебек
Вакытта да баш имәдең.
Рәхәт көтеп гомер үткән.
Һай, бу гомер!

Маңгайларга сырлар чигеп,
Чәчләреңә кырау сибеп,
Рәхәт көннәр килде үзе.
Ничә буын бәйрәмеңдә!
Оныкчыклар әйләнәңдә,
Бик бәхетле гомер көзең!

Барлык та күп,
Юклык та юк.
Гомер генә үтеп киткән...
Кай арада үтеп киткән?!
Рәйханә Зәйнуллина.
Бакырчы

Нравится
Поделиться:
Реклама
Комментарии (0)
Реклама
  • 23 октября 2017 - 14:24
    Защити себя!
  • Тормышыгызда нәрсәләрне үзгәртер идегез?
    Проголосовало 13 человек
  • Мин авылны сайлыйм!
  • «Ашыгырга ярамый, без бит балаларны йөртәбез!»
  • Яшел Үзәндә төрле милләт балалары татар телендә шигырьләр укыды
  • «Дуслар чабышы» Маяк спорт комплексында узды
  • Бакырчыда Мәүлид бәйрәме
  • Яшел Үзән пассажир автотранспорт предприятиясендә ничек бәйрәм иттеләр?
  • Авыр атлетлар кабат Яшел Үзәндә
  • Бакырчыда каз өмәсе
  • Яшел Үзән полициясе бәйрәм итте (ФОТОРЕПОРТАЖ)
  • Газовикларның риск зонасына васильеволылар да эләгә
  • 23 апреля 2018 - 11:06
    Яшел Үзән балалары сынатмый
    Узган җомгада “Пирамида” мәдәни-күңел ачу комплексында “Созвездие-Йолдызлык” ачык республика телевизион яшьләр фестиваленең гала-концерты узды.
    99
    0
    1
  • 20 марта 2018 - 15:31
    Игътибар! Түбән Урысбага авыл җирлегенә сәркатип кирәк.
  • 1 ноября 2017 - 10:53
    БЕЗ СЕЗНЕ КӨТӘБЕЗ! Белдерүләрегезне 5-67-02 телефоны аша яки Гоголь ур, 23а йортына килеп калдыра аласыз.
  • 24 апреля 2018 - 09:26
    Яшел Үзән районында 8 яшьлек кыз поезд астына эләккән Поезд астында калып һәлак булган 8 яшьлек кызны Казанның Арча зиратында җирләделәр
    182
    0
    1
  • 23 апреля 2018 - 14:35
    Спектакльләр бәйгесендә "Театр яктылыкка-нурга илтә!", – дип исемләнгән спектакльләр бәйгесендә Мулла Иле мәдәният йортының " Шонкар" театр коллективы драматург Т. Миңнуллинның "Әниләр һәм бәбиләр" исемле драмасын күрсәтте.
    174
    0
    0
  • 22 апреля 2018 - 18:12
    Кушкапка уеннары УЕН кешелек белән бер яшьтә. Ул безне үстереп кенә калмый, интеллектны формалаштыра, дөньяга мөнәсәбәтне булдыра һәм мөмкин булган башка төрле күзаллаулар белән үзебезнең карашны яраклаштыра. Бу бик акыллы язылган кебек тоела, әмма уенның асылын чагылдыра.
    138
    0
    0
  • 23 апреля 2018 - 08:52
    Туган җиргә кеше киләмени, туган җиргә кеше кайта ул! Юкка гына язмамны, әле күптән түгел генә 90 еллыгы билгеләп үтелгән танылган шагыйрь Әнгам Атнабаевның шигъри юллары белән башлап китмәдем.
    137
    0
    2
  • 22 апреля 2018 - 09:59
    Тәрбия нигезе – иман Вакыт-вакыт берәр чара, бәйрәм уздырып, дер селкетеп алмасалар, Бакырчы буламыни соң инде ул?! Шунысы да мактауга лаеклы Бакырчы халкы үз казанында үзе генә кайнамыйча, тирә-як авылларда яшәүчеләрне дә җәлеп итә белә.
    134
    0
    3
  • 23 апреля 2018 - 15:39
    Бюджет өлкәсендә эшләүчеләрнең хезмәт хакы арта 1 майдан минималь хезмәт хакы 11 мең 163 сумны тәшкил итәчәк.
    125
    0
    0
  • 23 апреля 2018 - 11:06
    Яшел Үзән балалары сынатмый Узган җомгада “Пирамида” мәдәни-күңел ачу комплексында “Созвездие-Йолдызлык” ачык республика телевизион яшьләр фестиваленең гала-концерты узды.
    99
    0
    1
  • 23 апреля 2018 - 12:52
    Май бәйрәмнәре алдыннан шимбә көнне эшләячәкбез 1 Май бәйрәме уңаеннан Татарстанда яшәүчеләр дүрт көн рәттән ял итәчәк.
    84
    0
    0
Ночной режим